In Wannel van de Jahrstieden

 Wintertied

Van Neeijahrskoken un Speckendicken

Vör mi liggt en Kockbook. En lüttje Widmung begrött mi, as ik de eerste Sied upslaa. "In Memoorje an Wiehnachten 1983,  dien Ollen" Rezepten ut uns Heimat sünd hier tosamenfaat un daarin fasthollen. Nu, waar dat Jahr to Enn geiht, söök ik uns traditionell Gerichten van Neeijahrskoken un Speckendicken herut.

So sitt ik nu, köört vör Neeijahr, mit mien Enkelkind in Köken un back Rullerkes. Mien Upgaav is, in de heet Damp van de Wafeliesder to sitten un daarup to luuren, dat sück ut de Plack van Mengsel en rund Wafel bildt. Wenn se klaar is mutt dat fix gahn. Bloot en paar Sekunnen laten se sück bearbeiden un to en Rull förmen. Mit en Mest löös ik de Flarr van de Wafeliesder, smiet hum tegen mi up Tafel un rull hum hannig up. En bietje bitter Wark, denn de Hett van de Iesder steckt noch in de Kookje. Indes de Pien in mien Fingerdoppen treckt, vertell ik mien Enkelkind van de Tied, as ik mit mien Moder un Grootmoder in Köken satt un ok Neeijahrskoken dreihde. 

 

Unnerwiels ik fabuleer, uns Prootje sück verdeept, riev ik de hett Iesder mit en Stück fette Speck of, bevör de tokomen Plack Mengsel de Middent bedeckt. Bi`t sloten van de Wafeliesder word he nu in sien rund Förm dwungen. Weer treddt  de hett Damp ut, in de sück de Röök van Kaneel un Anis misken. Indes de görig Wulk uns en Ogenblick  umgifft, snappt sück mien Grootkind de eerste Neeijahrskook.

Erinnerungen in mi worden wacker. Ik see mi, wo ik as Kind ok immer de eerste Neeijahrskoken eten dürs. Ik spöör in mi de Rüst, de mien Moder immer utstrahlde un mutt smüüstern. För hör was disse Bruuk heel van Belang un de moje un hartelk Stimmung, de bi dat gemeensame Backen enstunn, sünd mit disse Biller ut en verleden Tied verbunnen.

So mach ik ok an disse Bruken fasthollen, de mi sied mien Kinnertied geleiden un dat neje Jahr mit frisk backt Neeijahrskoken un Speckendicken begröten.

De Mengsel van de Speckendicken word ok een Dag vördeem anröhrt. De Deeg bruukt Tied um to rüsten, bevör man de Sirup-Pannkoken in Pann utbacken kann. Beleggt mit Plockwurst un Speck is dat en allerest Supunnerlaag um de Neeijahrsnacht goodto överstahn.Speckendicken to eten höört vör mi to en wichtige Bruuk ut mien Heimaat, de ik ok hier in Bayern wiederföhr. To Anfang was ik noch up „Kehrpacketen“ ut Ostfreesland anwesen, denn man kann de Speckendickenmehl hier nich klaar kriegen un ik muss immer en bietje inproviseeren.

Ok wenn dat en paar Stünnen bruukt um de Leckeree ut uns Heimaat to braden, holl ik daran fast. Ok mien Söhn wüür watt missen, wenn up Olljahrsdag kien Speckendicken up Tafel stahn. Vör mi is dat as mit uns Tee  drinken. Disse Traditioonen sünd vör mi as Shakels in en verleden Tied in de sück aver of un to to Reisen lohnt.

In disse Sinnen kummt all good in dat neje Jahr!