„Dat was noch fröh an’t Mörgen, as de Kökendör gans liesen apen gung. Dör de Spalt keek en lüttjet Kinnergesicht. Dat blonde Haar seet wild up de lüttje Kopp, as wenn de Seewind dörgahns dörflogen was. „Oma, dröff ik to di?“, flüsterte se mit en schalkhaft Lachen. Ik muss schmunzeln un heet hör tonickt. Gans tegen hör Natür bleev se aver in de Dörstee stahn un harr de Hannen achter de Rügg verstoppt. „Raat mal, Omi, wat ik daar hebbt?“ „Ik weet dat nich“, sää ik, „en Överraschung vör mi?“ Noch wieldess ik de Fraag stell, harr se mit eenmal en Hexenhoot up. „Huuuh“, sää se, „ik bin en Hexe“. Dat was nich to översehn un wieldess se sük to mi an de Kökendisk sett, vertell se upreegt un stolt, dat morgen Halloween is un se en Hexenkostüm kregen hett. Irgendwenn stunn ik up, gung kort in’t Slaapkamer un as ik wellerkwamm, droog ik ok en Hexenhoot. „Omili, du bist ja ok en Hexe – wo cool!“ Se vertell wieder, dat dat morgen en Gespensterbowle gifft, de hör Mama klaarmaken wull. „Wi können doch en Kook backen“, sää se vull Vorfreide. Ik harr jüst frisk Apfelkompott kookt un noch en fardigen Tortenbooden in de Vorraatsschank un al was de Idee vör en Gruselkook boren. Ik mag dat heel geern, wenn Kinner so völ as mögelk alleen maken können un de Todaten luden in, hör Fantasie free Loop to laten.
Chiaras Grieselkook
Bigaven
Söte Mumienbregen = Appelmuus
Rood Schubben van de Seetoverske = Karsenmarmelaa
Kook ut Steentiedmehl = klaar Tortenbaam
Geel Hard van een Urtieddraak = lüttje Döös Pfirsichen
Töverstoff = Rohmstief
Spöökgludder ut de Eier van de vertovert Tüütjevogel= Twee Eiwitt
Sand van de Undeerinsel = bruun Zucker
Vampirblood = rood Zuckerschrift
Töverhexenstiften = klörige Zuckerschriften
Töversliem = Tortenguss
Geheemdrank ut de Pütt van Düüsternis = Water
De Kook ut Steentiedmehl mit de Töverstoff bestreien, umdat he neet so gau smööi word. De Mumienbregen daarup verdelen. Dat geel Hard van de Urtieddraak in fien Schieven snieden un up de Bregen verdelen. Nu komen noch en paar rood Schubben van de oll Seetoverske daarto.
Mien Grootmoder hett dann de Töversliem na Gebruuksanwiesen in de Geheemdrank ut de Pütt van Düüsternis, kookt. Ik hebb hum dann mit een Lepel up de Baam verdeelt.
Indes he ofköhlt, hebben wi de Spöökgesichten maakt.
Toeerst kummt de Spöökgludder in en hoog Kumm. De Gludder kriggst du, wenn du Twee Eier van de vertovert Tüütjevogel upsleist. Heel vörsichtig trennst du de Gludder van de Eigeel. Mit de Mixer sleist du dat Eiwitt solang up, bit dat stief is. Na un na kummt de Sand van de Undeerinsel daarto. De Eisneei in en Sprütztuut geven. Ik hebb en Silikonmatt up de Backblick leggt un runn Krings daarup sprützt. In de vörheizt Backovend mutten se dann bi 100 Graad, 1 ½ Stünnen backen.
Na`t ofköhlen hebb ik, mit mien Töverhexenstiften, gruselk Gesichten upmaalt. An Enn noch en bietje Vampirblood updragen und de Gesichten up de Kook leggen.
Klaar is mien Grieselkook to Halloween.
„Mien Gruselkook is nu fardig, aver Omi, woso fiern wi eegentelk Halloween?“De Fraag leet uns nich los un so setten wi uns tosamen an de Laptop un versöchten Antwoorden up hör Fraag to finnen. Blangen mien eegen Sökerie, waar disse Bruuk van herkummt, hebben wi interessante Videos un Kinnerleder funnen, de ik hier instellt hebbt.